آزادليق قهرماني فريدون ابراهيمي نين خاطيره سيله: گولوستان لاله سي – د.لطيف
یازار : آزادتورك
يوخ دئدين چون ظاليمه اولدون بو خلقه جاودان
خوش باهارين ظولم اليله لاله تك توتدو نه قان
قصد ائدركن چون زامان شمشير چكدي باغلارا
عطريني يئللردن آلديم چون شفق پيغام ائديب
هر سحر باد صبا سؤيلر گينه سندن نيشان
باغ و بستان چون يانيب اؤلكه فلاكت دير بوتون
اود توتوب پروانه لر شعله چكيبدير جيسم و جان
خاطيره ن اؤلمز مزارين ائللرين قلبينده دير
داستان اولدو بو خلقه جورئتين ديلده بيان
او اگيلمز بوينون اولدو داردا عصيان صحنه سي
ايستيقامتدير بو سمبول ظولماتا غوغا سالان
ياتمايب طغيان سسي مين لاله لر آچميش يئنه
سسله نير توفان گينه توتموش اگر بستان خزان
نيسگيل اولدو خلقينه ايللر غريب تك او مزار
خاطيرينده بيرگولوستان لاله سي خوش بيرجاوان
مظهرعشق اولموسان خلقيم اونودمازچون سني
غنچه ناكام سولاركن بير قيزيل گول تك يامان
چون شفق سالدين سوزركن او قارانليق گؤيلره
ظولماتا وحشت دوشركن لرزه توتدو گؤر نه سان
ثبت اولوبدور خاطيره ن تاريخده گؤركم زيروه تك
سؤيله نر ديللرده ايللر دير كي او قانلي فغان
قهرمان اي خلقيمين آزاده ليك عصيان سسي
ياد ائدر ائللر سني تاريخ اونودماز هئچ زامان